La Sagre dal gjâl e cjape el non dal pizul borc dal Gjâl, quatri cjasis atôr de vile dal Lustrissin (famee Vanni degli Onesti), dongje dal Judri, sot la culine di Rutârs e pene fûr di Sant Andrât, in tal cunfin orientâl dal Friûl.

Propit in chist cjasâl, za a la fin dal Votzent, e je nassude la fieste, un timp une vore nomenade e preseade, che clamave dongje la int dai paîs atôr e di dut el Cuei.

Un volte, si sa, la vite dal paîs e are leàde ai lavôrs dai cjamps, che levin daûr al zicli da stagjons e da nature. Tal mês di Lui, seselât el forment e cjapât sù el prin fen, si pensave ancje a polsâ e a divirtisi lassànt daûr fadiis e pinsiars. E cussì e je nassude la biele tradizion da Sagre.

Dut si svilupave atôr dal grant vecjo morâr, un arbul maestôs c'al dominave la plazute dal Gjâl. Si conte che su li sôs ramazis si fasevin su tre palcs: in chel plui in bas e stave l'orchestre; su chel di miez si tignivin li botis da bire; chel plui alt al are riservât ai siôrs dal paîs e a lis autoritâts.

La sagre e durave une setemane e puartave tante ligrie: si beveve, si mangjave, si rideve, si cjantave e si balave. Li fantatis a screavin el vistît gnûf; a nassevin simpatiis e storis d'amôr. A la fin si spietave cun emozion la gare di bal, un romantic valzer: la coppie di balarins plui brave e cjapave in premit un biel gjâl vîf e ruspant.